主題
 
鄉土關懷
姐妹開步走
原知原味
教會人物誌
青年青不輕
鮮知啟示
信仰與生活
教會歷史
 
   
首頁 > 專欄文章 > 原知原味
推文:Facebook Facebook
點閱次數:372
字級調整:
上一則 | 下一則
用母語kā上帝寫入生活
作者 / 柯柏榮

■招街頭巷尾來寫台語詩

Kài chē 人認為「詩」離咱足遠、是一款足歹學ê文學藝術。每一款藝術,有伊ê思想kôan度,透過學習kap領悟,就會當hāⁿ入藝術ê戶tēng。

■Kā「動詞」用hō͘ 活

簡單講,「詩是生份ê語言」,伊m̄是直線,是彎曲線。詩ê本質就是kā正常自然ê感官或語言世界,透過扭曲、重排來製造新ê意義。

舉一个例,「我看著一隻鳥仔」,這是一句話,連散文mā m̄是,咱透過另外一款講法,就會無仝款,「彼隻厝角鳥仔leh kā我sái目尾」這句就是詩!咱攏知影厝角鳥仔是khah無定性ê鳥仔,伊隨時攏leh振動,當厝角鳥仔斡頭斡耳ê某一點,拄好kap咱ê目睭對著,伊koh隨斡過別位,這ê動作,kám有sêng leh kā 咱「sái 目尾」?

詩是用實體ê「具象」表達心內ê「抽象」。厝角鳥仔kā咱sái目尾,表達咱對「愛情」ê ǹg望。咱看著一蕊隨風搖擺ê玫瑰花,會當寫「愛情leh對我ia̍t手」;咱看著一幅足siú ê蘋果畫,會當寫「彼粒蘋果leh siâⁿ我ê喙瀾」。Koh比如「我ê心情若白滾水(生活白chiáⁿ無味)」「招憂愁乾杯(借酒解愁)」「趁燒!Lim一杯失眠(lim咖啡)」……,攏是無平常ê講法,不過這款生份ê語言,是kā咱心內ê感受借實體ê物件,間接講–出-來。也就是講,詩ê表達是弦外之音!而且是用滑溜ê動詞hō͘文字活跳跳–起-來。

■訓練聯想、粒積詞句

常在有學生問我,想beh寫文章ê時陣,攏m̄知按怎落筆?這是因為頭殼內底té–ê詞句無夠chē,咱會當用「聯想」ê訓練方式來粒積詞句。

咱用「老人」作例,若看著老人會想著啥物詞,盡量用實–ê具象詞。皺紋、拐仔、白內障、老花鏡、失智、病院……,想10个詞。koh lia̍h其中一个詞作中心,想同義詞、反義詞各一个詞,「皺紋」:魚尾仔(正)、thiāu-á-chí(反)。照按呢kā第一擺想–ê 10个詞,湠開一正一反兩个詞,按呢,就有30个詞。一工訓練30个詞,長久落來,頭殼內所粒積ê詞,隨時攏會當提出來運用。

聯想幾ê詞,用動詞kā接–起-來。對一chōa慢慢仔增加chōa數,長久訓練,就會當寫出chiâⁿ樣ê詩。〈落葉〉:「那會小可sip 一下秋/地球ê面皮/攏是你馬西馬西ê跤印」、〈夕陽〉:「拄學會曉行/隨規面紅貢貢/走kah無看人」。

我認為,做詩人上基本–ê,利利ê觀察力、孽孽ê想像力、厚厚ê同理心。透過五感去觀察天地萬物,創造新ê文字世界。

■Kā上帝寫入生活

我ê散文寫了khah少,差不多一本散文集ê量。上早期寫–ê散文內容,攏kap聖經有關。

有人講,「散文就是kā五感世界真實寫–落-來」,我認為,mā會當加入「虛構」ê劇情。咱以早ê經歷、聽來ê故事、家己創造ê故事……,攏會當用散文方式寫–落-來。

■200公尺寫1000字

按怎用1000字寫200公尺所看、所聽、所鼻、所感覺ê物件?

停tī十字路口等青燈,正pêng騎一台50cc o͘-toh-bái 30外歲 ê 查某人,頭前跤踏khiā一个3歲 ê 囡仔,後壁載兩个4、5歲ê囡仔,囡仔攏無戴安全帽,kā in ê 表情、穿插……詳細描寫,一幅困苦ê生活景緻就出–來-ah。斜對面一台卡車kap一台計程車相 lòng,兩个司機比手劃刀chèⁿ kah強beh拍–起-來,人性bái–ê一面就浮–出-來-ah。過紅青燈了後,一个老人牽一隻狗仔,寫老人ê悲哀。一對青年男女手牽手沿仔行沿仔講笑,寫愛情……。

200公尺會當發生足chē代誌,會當寫真實看著–ê、以早經歷–ê、聽–來-ê,這是「描寫」ê基本功,ài定定寫,咖啡廳、麥當勞、家己ê厝……,攏是寫作ê好場所。Ài會記,kā沿路ê物件透過筆,寫–落-來。

■經文tàu生活

有時,咱生活bē順,tī讀聖經ê時,會tī某一段經文chhōe著答案。有時,咱tng leh經歷一件代誌,雄雄會想起讀過ê經文拄好是這款情景。做一个基督徒,咱隨時攏活tī上帝ê恩典內底,歡喜ê時感謝主、艱苦ê時感謝主,無論tī啥物情景,咱攏leh感謝主,kā這款感動,用筆寫–落-來,這款信仰ê見證,是服sāi上帝ê一款方式。

文章與圖片出處:台灣教會公報第3534期


資料提供單位:台灣教會公報社
上一則 | 下一則

 

Copyright © 2000 - www.pct.org.tw All Rights Reserved.
powered by ICPCT. 台灣基督長老教會總會資訊中心 建置維護