Kipawtengatenga ki Taiwange Kirisitu Ciwru kiwkai

台灣基督長老教會信仰告白 (魯凱語)

Masalru nai ki Twaumase, ka wabekace, ka warathudu ki umawmase si sanaka manemanenga ka vaeva ka patengatengane ka Twaumase. Amani ku Tamatama ki lrikisi si yakawmasane, lri saibange si palribulu. Ku lalakeini, twalai ki Siri kikatwabaliri, la ngukai ki tawvailekete ka Malria kitulalake aumawmase, la aretesane mitane, ka amani kudra Takipalribulribulane ki sanaka umawmase ka Yesu Kirisitu, ngwakai ki takwalrianeini, kipakedrekedre ikai ki ziwzika si pacai, la sielane panianiake, pathingalanenga ku thaalradhane si dringelresane, ala siwlrita makadawdalru ki Twaumase. Ku Riini, amani ku Siri, yakai taelre mitane, la baai ku puku, ala maka ikaita ki sanaka umawmase akasikasi, pakela ku akelane ngusela ki Tamatama. Masalru nai, kai Sisiu amani ku sapelaelane ki Twaumase, ka nipacasane ku tapalribulaneini, ka amani ku asingikaiyaneta ki takisuswaneta si tapanianiakaneta.

Masalru nai, kai kiwkai tayelrelreane ki kawkawlu ki Twaumase, ka kiadawlu si lri pelaelaela ku tapalribulane ki Yesu Kirisitu, ka sasiakawlu ki apakadawdalrwane, ka yakawmasane, la balace ikai ki taikaiyane, si tarumara ki sanaka umawmase, la ngukai ki sakialibake si takwalriane, sapatuthingalane ki sasiadradrama. Masalru nai, kai umawmase ngwakai ki migemi ki Twaumase si ngitatupela, la kipacepe ku pasalrivane, arakai ku twakapatengatengane, ku kalithane si ngipapatarumarane ka sikace pakilrigu ki Twaumase.

Masalru nai, ku Twaumase wabaai ki umawmase ku akiwsakenane si thingalane, si takasumanemanane, ala kipaasipi kai umawmase ikai ki tabekacaneini, taelre iniane kipuawngane marasikaikai kai kawmasane. Lakamani, kai umawmase yakai ku nitukakudhaanane pangukai ki siakai, kunkwanane si tacekecekelane, la ikai ku pacase, ku thingalane apasakaikai darepe, si la ikai ku akisilapane ki Twaumase ku kidremedreme. Ai kai umawmase yakai ku pasalrivane, paamama arakai kilakikai nipatarumarane ka thingalane, mabebetethe ki umawmase si sanaka manemane si tamangangimiane ki Twaumase. Lakamani, kai umawmase lri satalu ku sapalribulane ki Yesu Kirisitu. Ku Twaumase Iri mukerenge ki umawmase patwalai ki pasalrivane, ku kiadredrepete ku umawmase lri kipangilralrainginga si paramaramavane, ikai adringi ki Kirisitu abavane ka kiabekace ka umawmase, kai kawmasane laika cekelengaini, si suete ku dringelresane, ku sulivatane si sakiaragai. Amingi.